ضماان للموت...بقلم احمد طرشاات..

أحمد طرشان/ مصر
ضمان للموت
واخد على خاطره المستحيل
وحابب يرجع للعدم
خيبتنا فالحة يادوب
تغني وتحيي العلم
وتسخن سرسوب النور
علشان تحمي الليل
**
قلبي صاحب اختراع الموال
وبراءة رص الآهة ع السكة
تتسابق عليها أوجاعنا
وياخد المركز الأول
التاريخ أبو ديل
**
حبيت أغربل الألوان
وأفصل منها لون الفرح
اتلخبطت مني
شكلت لوحة عبيطة
اشتراها ملياردير
يا وجع قلب الفرشة
ويا خيبة الغرابيل
**
ظبت ضلي بيسجد ويصلي
من ورايا
حبيت أعرف لمين
كانت المفاجأة
إنو بيدعيلي بالهدايا
ولقيت نفسي بقول
اللهم آمين
وبوحد المولى وأصلي ع الرسول
**
الهرم مخلوق حويط
شايل أسرار بلاوي
لو طلعها الزئبق يمكن
يتكلم أبو الهول
ويقول إن مفيش أصلن تحنيط
وبعصا موسى
يتعامد كل سحاب الشمس المتهرب
فوق النيل
**
لا صوابعي ولا صوتي
بقالهم بصمة
أنا زي القرش الممسوح
ومحدش بيقوللي تعالا
كلو بيقوللي روح
والحبر الفوسفوري
هوه اللي بيضمني
هوه لوحدو على وجودي دليل