الجيل الضائع ..بقلم أ.ميلاد نقولا

ألجيل الضائع...

تركت بلادي وبالغربة قضَّيْت سنين
وقلنا شوية رح نبقى وع بلادي عود...
وسنين الهجرة طالت فوق الأربعين..
وبعدو هالقلب بيوم الرجعة موعود...
يا بلادي الحلوة عَلَيْكِ برجع تخمين؟؟؟
عالأرض الفيها ربيت وفيها مولود ؟؟
ياما ناس بهالغربة متلي مساكين...
هَجْروا الضيعة والأرض اللي فيها الجدود
راحت ايام العمر دعسنا السبعين
ياريت سنين الماضي عالعمر تعود
سنيني كانت بالهجرة طوال وحلوين
لاكن تذكار بلادي بقلبي موجود ...
يا ضيعة الفيكي كنت بعمر العشرين
مش ممكن أنسى سحرِكْ والقلب شهود ...
بذكر إيام الصيف ووقت تشارين ..
ومشاويرك مَسْوييِ والدنيي ِبرود ...
وإيامِك بالشتويي وتلج كوانين...
ربوعِكْ حلوي يا بلادي وجَوِّكْ معبود
ولادي كبروا بالمهجر شو مرتاحين
بس الضيعة الربتني إلها مشدود
مْحَيَّرْني قلبي الهاجَرْ بعدو حَزين...
متل الشجرة الدبلانة و ناخرها الدود
ما بيقْدر يبقى هون ويسلى المسكين
ولا بيقدر يترك وِلْدو وعا بلادو يعود ...
يا غُربة شو تعذبنا فيكي مهاجرين
مهما غْنيْنَا ونْسيْنَا والمجد يسود...
بيضلو القلب يحن وينضَحْ حَنين .
للضيعة وللطاحونة اللي حجارا سود
وللنبع الدافق يسقي احلى بساتين ...
إنشالله يا بلادي الحلوي شي نهار بعود ...
...
ميلاد نقولا ملبورن أستراليا