رفع القلم...رمضاان علي..

=====رفع القلم=====
هى لحظة 
بين الوعى والجنون
رمشة عين
بين الضجة والسكون
قبل كنت باعذرك وانتظر
كنت اسامح من غير حساب
من غير عتاب
من غير ما اعرف مين غلط
مين الى مفروض يعتذر
قبل كنت عندى صبر
عمر قلبى فى حبى لك
ماغرق فى بحر كبر
كان عندى صبر
قبل كنت منك انت عليك بخاف
كنت عارف انك بتخلف بوعدك
وكنت عارف انك بترجع فى عهدك
صدقنى كنت عليك بخاف
كنت اسابق الزمن لجل احتويك
وفى برد طوبة اخلى جلدى لك لحاف
صدقنى عمرى كنت عليك بخاف
كنت احس بدموعك قبل نزولها
واجرى اجفف مجرى سيلها
كنت باشوف ابتسامتك
بهجة......و فرحة
وكنت اشوف الدنيا فى عنيا سمحة
صدقنى عينى كنت منك عليك بخاف
عارفك رقيق والنفوس بتسعى لك
زى الافاعى بسم زعاف
صدقنى عشت عمر حبك عليك بخاف
النهاردة هى لحظة واتغيرت كل المشاعر
مابقتش زى قبل بدموع عنيك جوايا شاعر
مابقتش عارف ازاى افرق بين الدمع
والابتسامة
النهاردة منى عليك انا حبى خايف
ما اقدرش افرق يعنى ايه لغة الشفايف
بعدك جرحنى هجرك دبحنى
بس عارف
بعد اللحظة ما بقتش اخاف لحظة الم
وازاى اخاف ورب العباد فى بعدك انت
رفع عنى القلم ...
هى لحظة.
=====رمضان على=====