كلام للناس العادية .. بقلم : خالد المنصوري

بكتب بكل عامية

• كلام لناس العادية
• معانيها  لحن اغنية
• كلام كله حينية
• وساعات تلاقيه أمنية
• تفصل منه جلابيه
• قماشته واسعة مكفية
• لا وزن ولا بحور شعرية
• بنام وأقوم الصبحيه
• أكتب زجل فى الضحوية
• وأنام لى حبة الضهرية
• واكتب كمان فى العصرية
• كلام بقوله بحرية
• وقت ما أعوز ييجى هدية
• فى حاجة أكتبها غية
• وشاعر بقى ليا شعبية
• بكتب كلام الناس فهماه
• عبد السلام يعرف يقراه
• أوام أوام يفهم معناه
• لو أشتكى يلاقى الآه
• وإن يوم بكى موال محلاه
• شاعر بكل شاب موجوع
• وكل بيت ميت من الجوع
• شاعر وعارف إيه الموضوع
• شعره صبح كلام مسموع
• ولا فتح ولا كسر ومرفوع
• شاعر بريح من الأوهام
• وساعات بفوق من الأحلام
• وساعات بروج حلو كلام
• وساعات بيصلح وقت خصام
• وأبوزيد ساعات وساعات ضرغام
• وساعات بدوق ذل الأيام
• بفرح وأحزن وأصحى وأنام
• واكتب كلام كله عامية وسلام 
• خالد المنصوري
• 3/10/2016