" التووووووك .. شوووووز ".. بقلم الاستاذ المبدع // محمد علي النقلي

" التووووووك .. شوووووز "

استك مطاط .. ف ايدين نطاط
ينط .. يفط ... يشد .. يمط
يلقط .. لقاط ... ولا 100 ملقاط

يظهر عالشاشه .. بكل بشاشه
ولا اجدع باشا .. ف المخ هشاشه
وف الزيطه .. زياط
خبير مواضيع .. ف الهيئه بديع
هادى ووديع .. والاصل وضيع
ولسانه .. سلاط
يبدأ ف كلامه .. يعرض ف علامه
وكابوس أحلامه .. يا سواد أيامه
و هات .. يا عياط
و زى الدبه .. ف غطسه و قبه
يخللي الحبه .. كأنها قبه
وفدانه .. بقيراط
ابن المفعوص .. يتك يدوس
عامل فلحوس .. زى الاراجوز
كداب .. حلياط
ويتنصب الزار .. وحوار من نار
يتحول تار .. يحرق ف الدار
ونشم .. شياط
ضيف على مضياف .. ف العقل خفاف
وقميص الاكتاف .. باين شفاف
وعايز .. خياط
يلضم الاتنين .. ويا المجانين
شهور وسنين .. طالما عايشين
دور .. الاستعباط
ولاد الملاحيس .. كله ف تهييس
همبكه تهجيص .. هيصه وتهييص
وخبط صاجات
ف سياسه و دين .. قسمونا فريقين
كفار ملاعين .. والباقي خاينيين
م النوبه. . لدمياط
يابتوع الإعلام .. والله حرام
بتبيعوا أوهام .. وكلام ف كلام
طحينه و سلطات
بتجيلكم هفه .. ترف الرفه
وتعملوا زفه .. لأمور زايفه
بخيابه .. وهيافات
غاويين تطبيل .. تهوين تهويل
تخوين تهليل .. تسخين تنكيل
وشغل العصابات
كفايه ياناس .. صبحنا مداس
ووجعتوا الراس .. حرمنا خلاص
لا مظاهره .. وثورات
لا خمسه وعشرين .. ولا يوم تلاتين
هانرجع عايشيين .. بالخيبه راضين
على حجر البهوات
تانى زى زمان .. وطني واخوان
كما خاتم "سليمان" .. ف"عز" و "سلطان"
ونعيش ف تبااااااااااااات
صبياااااااان .. وبناااااات
أشعار ... محمدعلي النقلي