فى ليلة عجيبه مصهللة
هحكيلوا حكاية مشعللة
عن عمدة حرامي وبالبلا
وفاطمة وجوزها أبو العلا
العمدة من خرم الحيطة
شاف فاطمة وقال أتجوزها
قالوا دي فى عصمة راجل
قال هتكفل أنا بجوزها
دبرلُه مصيبة تلمُه
بخ فى ودنه بسمُه
قالُه تطلق قدامي
ياتخش السجن حرامي
سمعت فاطمة الأراجوز
حلفت مايكون لها جوز
غير جوزها أبو العلا
وحفيظة مرات العمدة
دايما مع فاطمة معانده
وفاطمة كمان كيادة
تكيد فى حفيظة بذيادة
تطبخ للعمده فى وز
وحمام بفريك أو رز
تحشرلُه فى زورو الوزة
وتقولّه ياعمدة إتغذى
والعمدة يعبي فى كرشُه
م التخمة ينام على فرشهُ
وفاطمة تاخد قناصتها
والكبدة وجوز جناحيتها
والرقبه وطبق الفتة
لولادها وابو العلا
ياترى خلصت حكايتنا
لأ لسة التكملة
لما قالتله ياعمدة
أنا حامل فى الولا
قالها ودا جالي منين
مالمستك يوم ولا
قالت من شرع الله
من جوزي أبو العلا
العمدة فى لحظه إتشل
من طعم مرار الذل
والناس جايه تهنيه
وبجهل تبارك ليه
وهو فى سره يقول
دا مش إبني
تباركولي ليه
آدي جزاء إللي إتكبر
ماعملش لآخرته واتجبر
ولا يوم إهتم وراح لبى
لآدان بيقول ألله أكبر
بقلم طارق السيد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.