ماتسألش...
ازاي بكتب عن الفرح
ويومها الحزن يكتبني
دا انا ببقى في عزّ الجرح
وصوت الضحكة يحاربني
فلو كنت انا المبسوط
اكيد الشِعر كان باكي
ولو كنت ف يوم مثبوت
هتلاقي الحرف بعد غياب
انا مسامح
لاجل تعود الفرحة نتصالح
وننسى اللي كان
ببعد الأسى عن امبارح
انا وقلمي رجعنا لبعض
علشان نكتب سطر جديد .
ونقطة ونكمّل
حكاية عِشق كان كداب
بدون فاصل
قالي الشِعر نتواصِل
وبدأنا حكاية ليل
بقصيدة ولسان زجال
ودخنا سجايرنا انا وقلمي
وكان الحكم بينا صوابعنا
وصبغة حبر بهتانة
سرطانها عليل
اكيد هنميل
لكل لحظة بمعانيها
ماهو كل جرح في حياتنا
كان أصله سراب
فما تسألش ........
بقلم /أحمد سراج
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.