كلاام اولااد شواارع...بقلم محمود كامل مصطفى..

كلام أولاد شوارع
ءءءءءءءءءءء
أنا مش مجرم
ولا شوارعى 
أنا إنسان مولود
غير شرعى
واللى رمانى
فى حضن الدنيا
أم خطية
وأب شيطان
وأنا إيه ذنبى
ما هما جابونى
بعد ما عملوا
العملة رمونى
من غير دية
على البيبان
كانوا عايزين
يخلصوا من عارهم
كانوا خايفين
لا الناس تفضحهم
كنت ضحية
ما ليش عنوان
وبقيت كنز
كبير لعصابة
فى الإجرام
والسرقة ديابة
بقى عنوانى
فى أى خرابة
أو زنزانة
ورد لومان
بعد ده كله
الناس تحاسبنى
والمخاليق
كلها تعاتبنى
ويقولوا واد
بلطجى وحرامى
وده مش ذنبى
ده أبويا الزانى
اللى تركنى
ولا الحيوان
طبعا أكسر
بلدى وأدمر
وأحرق فيها
العود الأخضر
وإن جيت مت
ح أموت متقدر
زى شهيد
فى الثورة كمان
وأنا مش مجرم
‫#‏محمود‬ ‫#‏كامل‬ ‫#‏مصطفى‬