- *** الهوى ***
- ليه الهوى .. فى زماننا ....... راح أوانُه من زمان
- وف قلوبنا .. وف عيوننا ..... صخر سادد فى البيبان
- والصقور سكنت فى دورنا ..... والغرام رفسة حصان
- دا الهوى .. أصبح هوان ....... وبأمانه .. مش أمان
- ............
- الهوى برد و رياح ........ و إجتياح بحر العذاب
- الهوى طعنة رماح .......... منها راح العقل غاب
- يملا دنيا الناس جراح ....... من آلامُه .. القلب داب
- الهوى لفحة أمل .......... فرحُه هم وميت سراب
- ...............
- بحر حزن وسيل دموع ..... لو مشيتُه .. مفيش رجوع
- والغرام .. هُوَّا المَذلَّه ....... والحنين .. هُوَّا الركوع
- وفبُحوره مفيش شطوط .... أو مراكب .. أو قُلوع
- مُوجُه يحدِف فى قلوبنا .... صخرُه يخبط فى الضلوع
- ...........
- شمسُه تشعل نار ظنونا .... نعيش جنونا ف أحلى حيره
- شهدُه يسكر طير عقولنا ... ويَّا توهه .. و شوق وغيره
- روح بتغرق فى المشاعر .. والحبيب .. هُوَّا الجزيره
- والأمل .. هُوا.. طريقها .. والأمانى .. فيه كِتيره
- ..........
- بس نِفسى ألقى مركب ... بعد توهه كتير .. وحيره
- وألقى نجمه فى طريقى ... تهدى قلبى فى المسيره
- وألقى قلب يكون رفيقى ... يمسح الدمعه الغزيره
- وف ضلامنا نلقى مينا ... نِرسى فوقها .. ع الجزيره .. !!
- ............. تحياتى / حسن الليثى ...............
جريدة رواد الغد الثقافيه رئيسا مجلس الادارة م/علاء العجمي أ/نداء الرؤح
الثلاثاء، 21 يونيو 2016
الهوي .. بقلم : حسن الليثي
الاشتراك في:
تعليقات الرسالة (Atom)
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.