تربية الطفل .. بقلم : فاطمة شمندي

( هولع فيك بالكبريت ، ربنا يهدك زى ما أنت هاددنى ، طاخ طوخ طيخ ....... )

• الكلام ده يا جماعة بيتقال لطفل عمره سنتين ونص . صراخ وضرب وزعيق بشكل جنونى وهستيرى بشكل يكاد يكون يومى من أم لأبنها فى مثل عمره . فى مرة من المرات سمعت الولد بيعيط عياط هستيرى وصوته مبحوح من كُتر العياط وكأنه بيتوسل أمه أنها توقف ضرب وزعيق فيه وياتري ايه السبب لكل الصراخ والضرب ده كله ؟؟ الولد عمل حمام على نفسه على الأرض .أمه أكتر واحده بتحبه بس هى بتحبه حب الدب اللى قتل صاحبه وبتعامله بعنف هى بعد كدا أول واحدة هتعانى منه بجد وبعدين الأم دى بتحاسب أبنها على إيه بالشكل ده بتحاسبة على حاجة غصب عنه بتحصل لكل الأطفال الطبيعيين اللى عمره ؟؟ بتحاسبه على طبيعة جسدية ربنا خلقها فى كل الأطفال بتفاوت لآن كل طفل غير التانى ولكن من المتعارف عليه أن الطفل مش بيقدر يتحكم فى مثانته بشكل نهائي (التبول) غير لما يتم ال 3 سنوات ومش معنى أن الطفل من عمر السنة ونص لعمر ال 3سنوات بقى تمام وبيقضى حاجته فى الحمام وناشف نهائيا ليل ونهار أنه مش ممكن تحدث معاه حادثه لتبلل فراشه ليلا وده غالبا بيكون لسبب نفسى ناهيك عن أن الأم دى بتوصل رسالة سلبيه لطفلها ولنفسيته تدمر الثقة نهائيا ما بينها وبين طفلها وكمان بتسببله عقدة نفسية وعدم تقبله وتقبل ما يصدر منه من أفعال لا إرادية منه وغير متعمده بالمرة وقد تتمادى العقدة النفسية إلى المرض وهو التبول اللا إرادى حتى سن المراهقه ( مرحلة الإعدادية ). وعلى العكس من هذه الأم يوجد مثال للأم الواعية الفاهمه لطبيعة أبنها الجسدية والنفسية واللى بتتعامل معاه بنفسية سليمة وأعصاب هادئة وتقبل لمرحلته العمرية بكل الحب والإحتواء مع الصبر حتى تمر هذه المرحلة العمرية بسلام لأنه لو أخدنا بالنا أول 3 سنين فى عُمر الطفل هى أهم وأصعب 3 سنوات لأنه بيتعلم فيهم معظم العلمليات الحيوية اللى هيعيش بيها طول عمره ( الكلام والحركة بكل أنواعها من حبو وجلوس ومشى ) إيه المشكلة أن كل الأمهات يتعاملوا بصبر وتفهم لطبيعة المرحلة السنية وأختلاف الفوارق بين الأطفال وبين جنس الطفل فالبنت بتنمو قبل الولد فسيولوجيا وعقليا وحتى وهمَ أطفال البنت بتتعلم على البوتى قبل الولد وبتنشف نهائيا قبله برده وولد عن ولد يفرق وبنت عن بنت تفرق .وفى العموم فيه خطوط عريضة لطبيعة الأطفال ولكنها بتختلف فى التفاصيل من طفل للتانى ... بلاش نتعامل مع أولادنا بشخصية دراكولا مش هنكلهم ولا هنمص دمهم بس هنمص حاجة أهم بكتير هنمص نفسياتهم الفطرية الطبيعية السليمة اللى ربنا خلقهم بيها وهنحولهم إلى مرضى نفسيين . وأخيرا إلى كل الأمهات .. أطفالك جواهر وألماسات غالية بلاش تتعاملى معاهم على أنهم حديد مصدَى .
• 
  
• بقلم : فاطمة شمندى