انا كرهت العيشة...بقلم اسامة فؤاد..

انا كرهت العيشة كلمات اسامة فؤاد حنا
انا كرهت الناس والعيشة
وراح اعمل زى حبيشة
واشيل على كتفى سلاح
ماهى دنيا سداح مداح
هاعيش لئيم وحويط
ومش هامشى جنب الحيط
مش هاكون احتياطى ع الدكة
وراح اسلك فى كل سكة
الكل هايعمل لى حساب
وهاتتفتح لى كل الابواب
انا كرهت يا ناس الطيبة
اللى وقعتنى فى كام مصيبة
وعشان انا طيب غلبان
حبسونى ودخلت الليمان
ورجليه جت فى الخيه
وخسرت كل ما ليه
من غير كلام ولا رط
خلاص انا هابقى الخط
واللى ظلمنى هادوس عليه
ومش هارحم باشا ولا بيه
مش خايف م الكلابشات
والكلام كله خلص ومات
طول ما ف ايدى ماسك الى
مش راح اخاف مهما جرالى
انا معرفتش اكون انسان
وملقتش فى الدنيا مكان
انا النهارده ملك الغابة
ولا يهمنى اسود ولا ديابة
انا كرهت الناس والعيشة
مش راح اعيش تانى طيشة
ولا هاكون اهبل وعبيط
واستخبى واخاف جوه البيت