سهم الحب ..بقلك طارق السيد..

سهم الحب
ناوى أسيب الحب لناسه
لا اقرا كتابه ولا اشرب كاسه
إللى يحب بيوجع راسه
يلاقى الهجر برجلينه داسه
شوفت بعينى حالات وحالات
حالات معظمها أنين وآهات
وخضوع وخنوع وليالى أسيه
وناس مجروحه ومتأذيه
إللى بيحكى واللى بيشكى
واللى يعد نجوم الليل
واللى ينام دمعته على خده
لما حبيبه ورّاه الويل
انا قلبى ضعيف مش قد دا كله
ولا خدى يحب دموعى تبله
وانا كده مالى أنا مرتاح بالى
سعيد متهنى بقلبى الخالى
قولوا مجنون مهما تهاجمونى
ياناس مبسوط أنا كده بجنونى
وانا عارف إنى هغير رأيى
لما الحب بسهمه يصيبنى
بس هقوله ياحب عاهدنى
لو يوم جيتنى ما تعذبنى
وانا عارف لما يبوحلى بسره
هيقول إن حلاوته فى مُره
عارف إنى بناقض نفسى
بس ياناس قولت اللى نِفسى
بقلم طارق السيد