قصيدة الشاعر الحزين
لما جيت اكتب قصيدة
حروفي وقفت لي انتباه
قالت قبل اي حاجه
تعالي نذكر الاله
والعمل ويا الفريضة
هما دول طوق النجاة
لما جيت اكتب قصيدة
حروفي وقفت لي انتباه
الحروف دايما تعاند
وتخاصمني بالسنين
وتعاتبني ليه يا شاعر
كل كلامك حزين
قلت ليهاغصب عني
ان قلبي يكون حزين
من اللي شوفته في حياتي
واللي عشته من سنين
واللي يوماتي بشوفه
من الالام المجروحين
الغلا دمر جيوبنا
والغلابه مفلسين
الفقير دايما يعاني
والغني جلده تخين
ياكلو من اكل الغلابه
والغلابه ياكلو طين
يسرقونا في كل حاجه
ويتهمونا في الطحين
ردي يا حروفي عليا
ياللي بتلومي الحزين
هو ده ينفع يا ساده
هو ده في شرع مين
ردي يا حروفي عليا
ياللي بتلومي الحزين
في شرع مين
في شرع مين
ان الفقيريعيش حياته
في التابوت
وليه صراخه ينكتم
ويعلي صوته بالسكوت
ويربطوه ويعذبوه
بين خيوط العنكبوت
مش مهم انه يعيش
مش مهم انه يموت
المهم يثبتوه في الجداول
لاجل ياخدو منه صوت
ليه يا بلدي
ليه يا بلدي وحدي اشيل
وزرعي يحصده الغني
وتاكليني لحم الحمير
والاكل في ايديهم طري
وليه اليكي قلبي يميل
وتنصري المفتري
وليه تخليني حقير
والغني هو الولي
ليه يا بلدي
رضا ابو شنب
مصر
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.