- بقلم تامر النقيب
- ___________
- صباحَك ياوطن غالي
- وأسوار الأمل بدأت
- تكون قدامى ف العالي
- عيون السمرا بتفتح
- تقولي كلام
- وجايه عليَّا بتصبح
- وشايلة ف كفَّها الأحلام
- وتغزل أجمل المواويل
- وأقولها غني ألحاني
- حبيبتى النجوى بعيونها
- تناجينى فى ميدان العز
- وطير الثورة بيرفرفر
- وبيجَّمع فى عفش الرز
- وخايف لا الأمل يثبت
- وسكينه بإيدين الغدر
- فى صدرك ياوطن هتغُز
- ماتنهض فز
- بلاش الخوف وسلبيه
- نكملها ونطلب حقنا عادى
- وليه الخوف
- نخلِّى الثورة سلميه
- حبيبتى عيونها قتلانى
- وفيها الدمعه مخنوقه
- بشوفها نفسها تفرح
- لكن فى حبالها مشنوقه
- أكيد لما هتلقي النور
- ساعتها تجَّمع اولادها
- نحس بحضنها ويلذ
- لقيتك ياوطن حزنان
- وبتدور على ضحكه
- تزين دمعة الغلبان
- ما انا الشقيان
- وانا التعبان
- وانا العايش على الكتمان
- وانا اللى إسمى بقي إسمى
- وطن بيعانى م الحرمان
- شفتوش كلام الليل
- بيطيب المجاريح
- والصبح ليه كله
- بيطير في طي الريح
- صعبان عليا ياوطن
- ملقتش فيك تباريح
- بحسك لما بشكيلك
- تملى تخافي لكلامي
- برغم إنى بحبك حب
- يكون مكسوف
- يبين نفسه أُدامى
- وحتى اما يعَروكِ
- بغطيك ِ
- ولو قالوا خلاص ماتت
- بقول روحى فدا عنيكي
- بحبك لما بندهلك في عز الضيق
- وتبقي تملى سمعانى
- هو ليه كل الوسايل للتفاهم بالرصاص
- ليه بالحواجز والدخان
- ليه لما فيك النار تقيد
- بيزودوا فيها الحطب
- مابلاش خيابه يا للى ليها
- فاكرين شباكم تتنصب
- مابلاش بقى تشوفوا البلد
- مصلوبه واقفه بتتجلد
- دة احنا السند
- واحنا العتاد واحنا العدد
- واحنا اللى لو يوم مس طينها
- أى شر
- راح نبقي بركان من غضب
- ياللى إنتوا ماسكين السلاح
- ياللى انتوا حافظين الخُطب
- لنا كام سنه
- ما شوفنا بس غير التعب
- ملعون أبو الخوف اللى خلاَّ
- جميع حقوقنا بتتنهب
- صباحك ياوطن غالي
- ياريت ترجع بشكل زمان
- ونيلك فى البيوت يجري
- وشمسَك تضوي ف الأركان
- راح أغزل بالجمال توبك
- ويبقى زاهي بالألوان
- يا أم الدنيا يابلادى
- فداكِ الروح وعمري كمان
- أنا العاشق تراب أرضك
- وبكتب عشقي من دمى
- على الجُدران
- تامر النقيب من مؤلفاتى وليس منقولا
جريدة رواد الغد الثقافيه رئيسا مجلس الادارة م/علاء العجمي أ/نداء الرؤح
السبت، 5 نوفمبر 2016
ميدان العز .. بقلم : تامر النقيب
الاشتراك في:
تعليقات الرسالة (Atom)
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.