مشتاقة روحي
للسلام ..
نفسي افضفض
بالكلام ..
واطير ف السما
زي الحمام ..
واروح حدا
التوتة وانام ..
واحلم
يجيني ف المنام
إني أمير
ساكن قصور ..
ومعايا
الصبايا الحور ..
وأفضل كدا
مسحور ..
مشتاق
للصفصافة
وجدايلها
المغزولة بنور ..
مشتاق للساقية
لما تدور ..
تروي نجوع
وكفور ومداين .
آآآه م الحنين
جوايا ساكن ..
كل اما بارجع
م السفر
ألآقيني باشتاق
للأماكن ..
زي نسمة صبح
سارحة
في الجناين ..
تداعب
برقة الورد
يرقص على
سحرها ويتمايل ..
تعزف نغم
للقلب ..
يصحى الطير
اللي النايم ..
حتى النخل
العالي ..
كان شاهد
على حالي ..
شاهد على
سهدي
وسهري ليالي ..
كان ينزل
يقعد ويايا
كان يفرح
ويغني غنايا ..
كان يفرد ضله
ويحضن ف هوايا ..
مشتاق لنجوم
كانت ف سمايا ..
في مدارها تدور
سهرانة معايا ..
عارف أوصافها
وأماكنها ..
عارف أسمائها
ومعالمها ..
وهى كمان
كانت عرفاني ..
وعشقاني
وساكنة كياني ..
كنت باروح
على طول
واشكيلها ..
مشتاق أسهر
ليلة معاها ..
مشتاق أحكيلها ..
مشتاق أحكيلها ..
مشتاق أحكيلها ..
~~~~~~~~~~~~~
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.