صرخة المظلوم..بقلم المهدي العمري..

6- صْرْخْةْ الْمْقْهُورْ:خاطرة تعبر عن مأساة المقهورين فأنا على الأقل أجد قوت يومي حتى الآن بشق الأنفس رغم سقمي و مرضي أما المقهورين قوتهم يصلون إليه مرة و لا يصلون إليه مرات و شبح الموت يحيط بهم و لا يموتون: 
الْقْهْرَة صَارْتْ فْ ضْلُوعِي تْسْكْنْ
مْسَافْرَة فْ دْمِّي رَاكْبَة كُرَاتْ الدّْمّْ
تْسْقِينِي آلاَمْ وْ أَحْزَانْ وْ تْرْوِينِي بْ هْمّْ وْ غْمّْ
فْقْرِي يْصْفْعْنِي صْفْعَاتْ وْ الْحْكْرَة تْلْسْعْنِي بْ السّْمّْ
تْغْرْقْ رُوحِي فْ الدّْمْعَاتْ فْ نْهَارِي وْ لِيلِي نْتْأْلّْمْ
وْ الظَّالْمْ فَارْدْ فْ ظْلاَمْ جْنَاحْ الْجُورْ وْ الظُّلْمْ
صُوتِي يْعْقْدْ النّْبْرَاتْ لْ خُوفِي رَانِي مْسْلّْمْ
وَهَنِي غُولْ عْظِيمْ نْيَابُو عْلِيَّ تْقْرْمْ
مْخْنُوقْ نْصْرْخْ نْعَانِي وْ جْيُوشْ آهَاتِي عْلِيَّ تْهْجْمْ
دْنْيَا دْخَّانْ وْ تْخْدِيرْ وْ خَمْرْ دُوخَة وْ فْسَادْ وْ ظُلْمْ
تّْبْلِيتْ وْ لاَّ مَا تْبْلِيتْ الْبْلْيَة ذَاتِي تْسْفْكْ وْ تْعْدْمْ
فْ الْبْلْيَة مَا لِي عُنْوَانْ وْ الدّْخَّانْ صْحَّة لِيهْ نْشْمّْ
فْ قْيُودُو رَانِي نْدُوخْ وْ نْمُوتْ إِيلاَ مْعَاهْ مَا نْتْأْقْلْمْ
تْكُونْ حْنِينْ ظْرِيفْ قْلْبْكْ يْحْنّْ وْ يْرْحْمْ
يْرْدُّوا رْبِيعْكْ خْرِيفْ وْ قْلْبْكْ بْ الشّْرّْ مْظْلّْمْ
وْ أَنَا دِيما نْفْكّْرْ بْ تْفْكِيرِي مْعْذّْبْ وْ مّْحّْنْ
عْقْلِي وْ قْلْبِي فْ حْرُوبْ وْ صْدْرِي مْحْرُوقْ مْأْزّْمْ
مْنْ مَالْ الدّْنْيَا مْسْلُوبْ فْ أَعْمَاقِي فْقْرِي يْتّْرْسْمْ
وْ هَذَا جْهْلُو طُوفَانْ وْ كْلاَمُو خْبِيثْ وْ مْبْسّْمْ
مْعَانْقْ شِيطَانْ أَفْكَارُو لْ مَالْ الدّْنْيَا يْحْضْنْ
وْ أَنَا فْ التُّوهَة وْحْدِي وَاصْلَة لِيَّ للعْظْمْ
مْشْرُوخْ مْظْلُومْ مْقْهُورْ وْ الصّْرْخَة للصّْمْتْ تْسْلّْمْ
خَايْفْ فْ طْرِيقِي ضَايْعْ بْ خُوفِي رُوحِي نْظْلْمْ.
................................تابع..............................

• .................................................من توقيع/المهدي العمري.