غالية عليه..بقلم محمود مسعود..

غالية عليه ............!!
ـــــــــــــــــــــــــــــــــــــــــــــ
أنا مستنيكي يابهية
مطوليش
يام العيون مداريه
ورا الكحلة من طينك
ماتغيبيش
وحاعيش علي طول أغنيلك
أحلي المواويل
في نهار وليل
وامشي علي النيل
شايل قناديلك
نفضي ترابك ياصبية
وريني الضحكة ياعنيا
إن غاب الليل
مشوارنا طويل
حنعديه وياكي والله ياصبية
شمسك بتقول احلي الكلام
طول السنة آه ياسلام
والناس بتروح وتجيلك
مش ناسية الشرب من نيلك
ولا قاعدة ساعة عصرية
جنب الهرم يام الدنيا
فاتحة أحضانك
للي عشانك
سهر ليالي طويلة
يحلم بلمة العيلة
ساعة الفطار
أو خارج الدار
في فسحة جميلة
آه يابهية
ياست الدنيا
ضحكتك والله
غالية عليه
ــــــــــــــــــــــــــــــــــــــ
بقلمي / محمود مسعود ( عامي ) 12/5/2016م

•