مين السبب..بقلم احمد السحراوي..

{{ مين السبب }}

مين السبب؟
واللوم على مين والعتب
والحق فين.. إللى اتسلب 
والظلم فوق راسنا اتكتب
والقتل فينا..
والضحايا للركب

شفتم حلب.. آه ياحلب
الجرح دامى فى القلوب
والعقل شارد فى ذهول
والدمع دم بينسكب

مين السبب؟
واحنا اللى شاركنا فى قتلك
واحنا اللى حاولنا اغتيالك
كل أبناء أبناء العرب
واحنا اللى دبرنا المعارك
بالحكاوى والاغانى والخطب

إحنا اللى ما سمعنا صراخك
واحنا اللى قطعنا حبال
القرب منك والنسب
ماتت فينا الرجولة والشهامة
والاخوة والمروءة
واللى باقى منها صورة
أو لقب

مين السبب؟
واحنا اللى شاغلنا الكراسى
والمناصب والرتب
واحنا همومنا فى الملاهى
والملاعب والاغانى والطرب

آه ياحلب ؛
ياصرخة فى وجه العروبة
عمرها ما هتنشطب
يادمعة سالت فوق خدودنا
ياحرقة سكنت فى قلوبنا
ياكلمة مكتوبة بألوان الغضب

ياللى التاريخ ساكن ترابك
والأنبيا عاشوا ف رحابك
والعلم كان فيكى
وأرباب الكتب

آه ياحلب؛
إتخلو عنك كلهم
والدم لسة فى نبضهم
والخسة صبحت طبعهم
والعدل فى حياتهم هرب

سابوا الكلاب تنهش فى لحمك
والدمار نازل بأهلك
والنار بتحرق عمر طفلك
والحلم فيكى بينضرب

لكن ياصابرة..
كلنا واقفين معاكى
سامعين صراخك
سامعين نداكى
كل أحرار العرب

رافعين إيدينا للإله
يسمع دعانا فى سماه

ينصر ولادك عا الأعادى
ويطهر الشام والبوادى
ويرجع الفجر إللى تاه
والشمس تطلع فى مداه
والبسمة ترجع عا الشفاه

صبرا ياشهبا..ليكى رب

بقلم \ احمد السحراوى