بهية
مصر يابلدي ياقبر غازيكي
ياكتاب إسود للى آذيكي
رجعت لعقلي وراجع ليكي
أعمر فيكي بادي بحواريكي
وأشق قناية تجري فى أراضيكي
تروي زهور عطشانة حواليكي
طول مانتي يابلدي فى حفظ باريكي
أيادي الشمس تطول شبابيكي
تصلب عودي..أبني واعليكي
وان جيتي عليا ورحت اشكيكي
هروح اشكيكي منك ليكي
نعمة وأنعم بيها عليا
رب الكون تكونيلي بهية
بس إتعافي ياست بهية
خطي الخطوة إسندي عليا
إن مت هييجي كتير بعديا
يكملوا طوبة بنيتها إديا
مليون فهد ومليون سبع
ضد الذئب وضد الضبع
وضد تعالب سده النبع
وضد كروش مليانة من جوعنا
وضد وحوش تكسر فى ضلوعنا
عرفنا يابلدي سبب أوجاعنا
ومين كان شاري ومين كان باعنا
عرفنا خلاص من ساسنا لراسنا
عرفنا خفايا فى سطور كراسنا
طول ماصدورنا حوت أنفاسنا
هيفضل كتفنا شايل فاسنا
بقلم طارق السيد
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.