مْيّْتْ حَيّْ وْ نْحْبّْ بْلاَدِي:رغم المعاناة التي لا يمكن وصفها فإني لا زلت أحب و أعشق بلادي:
يَا بْلاَدِي مْقْسُومْ ظْهْرِي
وْ بَاقِي نْهْدِيكْ عْمْرِي
وَاخَا يْسْجْنِّي فْقْرِي
وْ نْقَاسِي نْتْغْطَّى بْ صْبْرِي
إِيلاَ حْقِّي فِيكْ ضَاعْ
انْتِ مَا تْنْسَايْ إِنْسَانْ
لاَ بُدّْ نْرْفْعْ الشّْرَاعْ
وْ نْضْمّْ حْقِّي بْ أَمَانْ
سْفِينْةْ الْحُبّْ نْقُودْ
لاَ هْوَى فَاسْدْ يْسُودْ
وْ الضَّمِيرْ لْ أَعْمَاقْنَا يْعُودْ
وْ نْعْزْفْ أَحْلَى الأَلْحَانْ
بْ خِيرْ وْ حَنَانْ فْ الْمْكَانْ
وْ نْحْقّْقْ الْحُلْمْ الْمْنْشُودْ
يَا بْلاَدِي نْهْدّْ الصّْمْتْ
فْ قْلْبْ مْظْلُومْ فْ رُعْبْ
يْسْرِي فْ دْمُّو الْمُوتْ
يْصْرْخْ بِينْ الشّْعْبْ
فْ يُومْ يَا بْلاَدِي الْفَقِيرْ
مَا يْعُودْ مْعْذّْبْ يْنْدَاسْ
مَا يْدُوسْ عْلِيهْ حَقِيرْ
وْ يْقْتْلْ فِيهْ الإِحْسَاسْ
شْمْسْ الْغِنَى تْشْرْقْ
فْ نْفْسْ مْنْوّْرَة بْ رُوحْ
مَا عْمّْرْ قْلُوبْنَا مَا تّْفْرّْقْ
وْ أَحْقَادْهَا تْطْفَى وْ الْجْرُوحْ
وْ الطّْمْعْ مَا يْعُودْ يْسْرْقْ
نْسْمْةْ كَرَمْ تْفُوحْ
يَا بْلاَدِي ضْمِّي وْلاَدْكْ
ضْمَّة حْنِينَة
نُورْكْ يْغْلْبْ سْوَادْكْ
يَا أُمِّي الْحْنِينَة
الْفَقِيرْ لِّي عْلِيكْ يْحْقْدْ
مَا يْعُودْ قْلْبُو مْجْرُوحْ
وْ لِّي حْقُّو فِيكْ فْقْدْ
تْعُودْ فِيهْ الرُّوحْ.
- .........................من توقيع/الخائف من الظلم المهدي العمري
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.